الحلقة الأولى
التقى الرفاق الثلاثة فى أحد المقاهى وبدأوا يتجاذبون أطراف الحديث ...
كوكو: شفتو اللى حصل يا جماعة .. شئ مش معقول
ميدو: ماحنا بنشوف كتير .. قصدك على إيه بالظبط
سيكو: شششش .. حبة سكوت يا جماعة مش عارف اركز
كوكو: تركز فى ايه يا عم .. هتعمل فيها رئيس وزرا
ميدو: اشمعنى رئيس وزرا يعنى .. مفيش غيره بيركز؟!
كوكو: وهو لو حد غيره بيركز كان زماننا حاصل فينا دة كله !
ميدو: خلاص يا عم كوكو .. القهوة مرشقة مخبرين .. قولنا يا سيكو بتركز فى ايه ؟
سيكو: مش سامعين اللى بيتقال فى التلفزيون .. الجزائر مقطعة مصر يا حرام .. امال انت كنت جاى تقول مش معقول ليه يا كوكو ؟
كوكو: أصلى عرفت حبة أخبار كدة عكننت عليا بصراحة
ميدو: أخبار إيه ؟! ماتفهمونى .. بتتكلمو بالألغاز ليه كدة؟
سيكو: اهدى انت بس .. خير يا كوكو عرفت إيه؟
كوكو: الدقيق بتاع الخبز طلع مختلط بعلف الحيوانات وغير صالح للاستهلاك الآدمى .. والقضاء حكم ببراءة صاحب العبارة من دم الألف قتيل .. و.....
ميدو (مقاطعا) : طب ودة خطر مش كدة؟
سيكو: يالهوى يا كوكو .. دانت قديم قوى يا أخى .. بقولك دلوقتى الجزائر بتهاجم مصر
ميدو: يعنى هى دى أحدث الأخبار يا سيكو؟!
سيكو: اه طبعا .. دى الدنيا مقلوبة
كوكو: واللى قلته بردة الدنيا كانت مقلوبة عليه
سيكو: أديك قلتها .. كانت مقلوبة .. يعنى خلاص ماضى وعدى
كوكو: لا ماعداش ولا حاجة .. لسة الخبز مايتاكلش .. ولسة دم أهالى ضحايا حادثة العبارة مابردش لأنهم ما أخدوش حقهم
ميدو: انت عايز تقول ايه يا كوكو؟
كوكو: عايز أقول ان مهما كانت الأخبار الخارجية تهمنا ماينفعش ننسى أخبارنا الداخلية.
سيكو (ساخرا) : خلاص اسكت بقى .. خليك فى الأخبار المحلية
كوكو: أتحداك ان موضوع الحرب دة لما يخلص هيفاجئنا الجهاز المركزى للمحاسبات بأن فى كام مليار دولار مفقودين
ميدو: الجهاز المركزى للمحاسبات؟! دة غير اللاب توب؟
سيكو (منفعلا) : اسكت ياعم انت ولا قوم من هنا .. قصدك ايه يا كوكو؟
كوكو (مرتبكا) : لا يا عم ماقصدش حاجة
ميدو: لا انت اتكلمت عن مليارات مفقودة
كوكو: وطى صوتك بقى .. ولا غير الموضوع أحسن
ميدو (بصوت مرتفع) : ليه يا عم واحنا بنسرق .. البلد فيها حرية
ربت أحد الأشخاص على كتف (ميدو) قائلا:
- مالها البلد ياله انت وهو .. عاملينلى فيها مجلس شعب
ميدو (مفزوعا) : يا باشا انا بقول ان البلد فيها حرية .. ماغلطتش يعنى
- ماتتكلمش كتير .. شايفين البوكس اللى هناك دة .. يلا روحو اركبو فيه
وأمر ذلك الشخص ثلاثة من رفاقه الذين كانوا واقفين خلفه أن يصطحبوهم إلى سيارة الشرطة وسط سخط وقنوط (كوكو) و(سيكو) من غباء وسذاجة زميلهم (ميدو) .....
موضوع: سلسلة قصص ثلاثى اضواء المنتدى(اوعى تتكلم فى السياسة) 
الثلاثاء ديسمبر 29, 2009 6:54 pm
